نوسینی محەمەد رەئوف
لالۆ عەبدولڕەحمان پێنجوێنی ( 1933 -2012) یەكێكە لەو پێشمەرگانەی كە لە ساڵی 1979 دەچێتە شاخ و بەیەكێك لە پێشمەرگە هەرە دڵسۆز و ئازاكان دەناسرێت، لە ساڵی 1985 رژێمی بەعس ژن و سێ منداڵەكەی دەگرن و دەیانخەنە زیندان لە ئەمنی پێنجوێن، لەو ساَلەدا دەزگای ئیستخباراتی بەعس لە رێگەی خزمێکی خۆیەوە نامەیەك بۆ لالۆ پێنجوێنی دەنوسێت و سێ بژاردەی دەخاتە بەردەست بۆ ئازادكردنی ژن و سێ منداڵەكەی بە پێچەوانەوە لەناو زینداندا دەیانكوژن:
– وازهێنان لە پێشمەرگایەتی و تەسلیم بوونەوە
– یان مانەوە لە شاخ و زانیاریدان بە ئیستخبارات
– یان لە گوندێك دابنیشەو هەقی شۆڕشت نەبێت
لالۆ پێنجوێنی بە نامەیەك وەڵامی بەعس دەداتەوەو لە نامەكەدا دەنوسێت:
” من بۆ رزگاركردنی هەموو ژن و منداڵانی كورد چومەتە شاخ و بومەتە پێشمەرگە، ئێستا ئێوە داوای ئازادكردنی تەنها 4 كەس لە من دەكەن، بۆیە داواتان لێدەكەم بە گەیشتنی ئەم نامەیەی من یەكسەر ژن و سێ منداڵەكەم بكوژن”
كەس بەم وەڵامەی لالۆ پێنجوێنی نازانێت تەنانەت سەركردەكانی شۆرشیش ئاگادارناكاتەوە بەتایبەت ( مام جەلال و كاك نەوشیروان) كە لە نزیكەوە دەیانناسی و بەرپرسی بوون، لەدوای راپەڕینی بەهاری 1991 و دەستگرتن بەسەر زۆرێك لە بەڵگەنامەكاندا و پاشان ناردنیان بۆ ئەمریكا، ئەو بەڵگەنامانە لە ئەمریكا جیادەكرێنەوە، لەناو بەڵگەنامەكانی بەعسدا ئەو نامەیەی لالۆ پێنجوێنی دەدۆزرێتەوە دەكەوێتە بەردەست ( شۆڕش حاجی) كە ئەو یەكێك بوو لەو تیمەی بۆ ماوەی دوو ساڵ لە ئەمریكا كاریان لە جیاكردنەوەو پۆلێنكردنی ئەو بەڵگەنامانەدا كردووە، بە بینی نامەكە زۆر سەری دەسوڕمێت كە پێشمەرگەیەك بە دەستوخەتی خۆی نامە دەنێرێت بۆ بەعس و بێمنەتییان لەبەرامبەردا نیشاندا دەدات كە ژن و منداڵەكانی بكوژن، دواتر نامەكە كۆپی دەكات و دەینرێت بۆ ژن و منداڵەكەی لالۆ پێنجوێنی و ئێستاش نامەكە ماوە ( كە دواتر ژن و منداڵەكەی لالۆ پێنجوێنی بەر لێبوردن كەوتن و ئازادكران، لە زیندانی موسڵ… بەڵام ئەوەی سەیرە زیندانیانی سیاسی وەك زیندانی سیاسی تۆماری نەكردون لەبەر ئەوەی بەر لێبوردنی گشتی كەوتوون، بەڵام ئەو كەسەی بە گرتی داون
ئێستا كەسوكارەكەی شەهیدانەی وەردەگرن) .
تێبینی:
سوپاس بۆ کاك محەمەد ڕەئوف بۆ نوسینی ئەم بابەتە
لەم نوسینەدا هەندێ هەڵەی تێدایە وەك
- نێردراوەکە کە نامەکەی هێناوە، هاوڕێ و ناسیاو بووە نەك خزم
- یەكێك لە داواکانی تری حوکمەت گۆڕینەوەی ژن و مناڵی لالۆ لەگەڵ مدیری ئەمنی کارێزە، کە ئەو کاتە لای یەکێتی نیشتمانی کوردستان دەستگیرکرابوو. بەڵام لالۆ ئەمەش ڕەد دەکاتەوە. بڕوانە کتێبەکەی لالۆ خۆی {نیو سەدە بؤ نیشتمان} لاپەڕە {599-601}.
- بەهیچ جۆرێك بەڵگنامەکەی لالۆ لای ئەمن نەدراوەتەوە دەست لالۆو ماڵ و مناڵی. بەداخەوە هەتا ئێستاش دیار نییە لای چ کەس و لایەنێکە.